News in english

FTT & Bylgjan lřsa ßnŠgju me­ afrakstur 1.mars nefndar

Eins og fram kom á nýársfundi FTT  í janúar var síðla árs  2010 settur á fót starfshópur á vegum Bylgjunnar og FTT, Félags tónskálda og textahöfunda, með það að leiðarljósi m.a. að efla enn hlut nýrrar íslenskrar tónlistar á stöðinni , umfjöllun um hana og að auka jafnframt skilvirkni við móttöku nýrrar tónlistar, en hlutfall íslenskrar tónlistar mælist um þessar mundir yfir 40% á Bylgjunni .
 
Eins og fram kom á nýársfundinum var hópurinn búinn að sameinast um markmið og niðurstöður er senn yrðu kynntar. Samstarfshópurinn gengur undir nafninu 1.mars nefndin, en þann dag tekur nýtt fyrirkomulag gildi.

1.mars nefndina skipa þeir Sigtryggur Baldursson fyrir FTT, Skarphéðinn Guðmundsson fyrir Bylgjuna og Pálmi Guðmundsson fyrir 365 miðla .
Niðurstöður 1. mars nefndarinnar eru í sjö liðum og fara hér á eftir:

1)    Skipaður hefur verið Umboðsmaður íslenskrar tónlistar á Bylgjunni og
verður það Skarphéðinn Guðmundsson frá og með 1.mars. n.k.

2)    Sama dag  verður kynntur til sögunnar nýr þáttur sem ber nafnið Íslensk tónlist
og verður hann helgaður nýrri íslenskri tónlist. Þátturinn verður á sunnudagskvöldum frá og með mars.

3)    Nýtt móttökukerfi verður innleitt 1.mars á heimasíðu Bylgjunnar merkt Íslensk tónlist þar sem hægt er að senda inn í hágæðum nýja tónlist og  hlýtur sendandi samstundis staðfestingu á móttöku og svarbréf frá Bylgjunni.
 
Viðkomandi lag verður síðan sett í spilun í nýja þættinum Íslensk tónlist sem verður jafnframt hægt að nálgast það á vef Bylgjunnar og á Facebook þar sem hlustendur geta brugðist við með “like” eftir því  sem við á.
 
Í framhaldinu verður lagið lagt fyrir Tónlistarráð Bylgjunnar og niðurstöður að því loknu kynntar sendanda .
 
Hljóti lagið brautargengi verður það loks lagt fyrir Hlustendaráð Bylgjunnar þegar umtalsverð spilun hefur átt sér stað.
 
Einnig er hægt að taka við nýrri tónlist með hefðbundinni póstsendingu í geisladisksformi eða á netfanginu islensktonlist@bylgjan.is sem beint verður í sama farveg.

4)   Tónlistarráð Bylgjunnar hefur þegar verið breikkað og inniheldur nú fimm einstaklinga af báðum kynjum á aldrinum 24 – 49 ára.

5)   Fjölgað verði í Hlustendaráði Bylgjunnar frá og með 1.mars til að gefa því aukna breidd og aldursdreifingu.

6)   Efnt verður til árlegra stórtónleika í samstarfi FTT og Bylgjunnar er miði að umtalsverðum frumflutningi nýrrar íslenskrar tónlistar og kynningu á henni í kjölfarið.

7)   Tónskáldasjóður 365 verður efldur á árinu en sjóðurinn miðar að aukinni sköpun og framleiðslu
íslensks tónlistarefnis. Sjóðurinn hefur þegar styrkt á annað hundrað verkefna en hann var stofnaður
árið 2005 að frumkvæði Magnúsar Kjartanssonar þáverandi formanns FTT og Ara Edwald forstjóra 365.

Stjórn FTT og yfirstjórn Bylgjunnar og 365 fagna þeim skrefum sem hér hafa verið stigin í þágu íslenskrar tónlistar og fjölmiðlunar, en framlag tónlistarinnar til menningarlífs og hagkerfis Íslendinga  verður seint fullmetið. 1.mars nefndinni eru þökkuð frábær störf og öðrum sem að komu, þ.m.t. Eiríki Tómassyni framkvæmdastjóra STEFs, Jóhanni G. Jóhannssyni sem átti frumkvæði að samstarfsnefndinni árið 2009, Kjartani Ólafssyni formanni STEF og Jóni Ólafssyni  framkvæmdastjóra FTT.

F.h. Félags tónskálda og textahöfunda                  F.h. Bylgjunnar & 365

Jakob Frímann Magnússon, formaður                    Ari Edwald, forstjóri 365 miðla
Sigurður Flosason, varaformaður                          Pálmi Guðmundsson, dagskrárstjóri
Sigtryggur Baldursson fulltrúi FTT                         Skarphéðinn Guðmundsson, fulltrúi Bylgjunnar